Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Häkim Gahryman Arkadagymyzyň doglan güni mynasybetli welaýatyň ähli ýaşaýjylarynyň adyndan iň gowy arzuwlaryny beýan edip, Milli Liderimizi we hormatly Prezidentimizi Arkadag şäheriniň döredilmeginiň şanly senesi bilen gutlady. T.Nurmyradow welaýatyň gallaçy daýhanlarynyň döwlet harmanyna bugdaý hasylyny tabşyrmak baradaky şertnamalaýyn borçnamany üstünlikli ýerine ýetirendikleri baradaky hoş habary aýtdy hem-de öndürijilikli zähmet çekmäge döredilýän şertler üçin hormatly Prezidentimize we Gahryman Arkadagymyza welaýatyň ýaşaýjylarynyň adyndan hoşallyk bildirdi.

Soňra häkim welaýatdaky möwsümleýin oba hojalyk işleri barada hasabat berdi. Bellenilişi ýaly, häzirki wagtda ýetişdirilen bugdaý hasylyny doly ýygnap almak, galla oragyny tamamlamak, bugdaý öndürijiler bilen tabşyrylan hasyl üçin hasaplaşyklary öz wagtynda geçirmek üçin zerur çäreler görülýär. Gowaça ekilen meýdanlarda hatarara bejergi, mineral dökünler bilen iýmitlendirmek, ösüş suwuny tutmak işleri dowam edýär. Welaýatyň ekerançylyk meýdanlarynda gök-bakja ekinleriniň hasylyny ýygnap almak, bu önümler bilen içerki bazarlarymyzy üpjün etmek boýunça degişli işler geçirilýär. Şeýle hem häkim şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz welaýatyň gallaçy babadaýhanlaryny şertnamalaýyn borçnamalaryny üstünlikli berjaý etmekleri bilen tüýs ýürekden gutlady hem-de mundan beýläk-de zähmet üstünliklerini arzuw etdi. Döwlet Baştutanymyz gowaça meýdanlaryndaky agrotehniki çäreleriň talabalaýyk ýerine ýetirilmeginiň möhümdigini belledi we häkime bu babatda anyk tabşyryklary berdi.

Soňra Balkan welaýatynyň häkimi H.Aşyrmyradowa söz berildi. Häkim Gahryman Arkadagymyzyň doglan güni mynasybetli welaýatyň ähli ýaşaýjylarynyň adyndan iň gowy arzuwlaryny beýan edip, hormatly Prezidentimizi hem-de Milli Liderimizi Arkadag şäheriniň döredilmeginiň şanly senesi bilen gutlady.

Şeýle-de häkim welaýatyň gallaçy babadaýhanlarynyň bugdaý hasylyny tabşyrmak boýunça şertnamalaýyn borçnamany üstünlikli ýerine ýetirendikleri baradaky hoş habary aýtdy hem-de bugdaýyň bol hasylyny ösdürip ýetişdirmäge döredilýän ähli şertler, berilýän hemaýat-goldawlar üçin hormatly Prezidentimize, türkmen halkynyň Milli Liderine welaýatyň ýaşaýjylarynyň adyndan tüýs ýürekden hoşallyk bildirdi.

Soňra häkim welaýatda dowam edýän möwsümleýin oba hojalyk işleri barada hasabat berdi. Bellenilişi ýaly, häzirki wagtda sebitiň bugdaý meýdanlarynda hasyly soňky dänesine çenli ýitgisiz ýygnap almak boýunça degişli işler ýerine ýetirilýär. Bugdaý öndürijiler bilen tabşyrylan hasyl üçin hasaplaşyklary öz wagtynda geçirmek üçin zerur çäreler görülýär. Gowaça ekilen meýdanlarda hatarara bejergi, ösüş suwuny tutmak, mineral dökünler bilen iýmitlendirmek işleri ýerine ýetirilýär. Ýurdumyzda azyk bolçulygyny has-da pugtalandyrmak boýunça öňde goýlan wezipelerden ugur alnyp, ýeralmanyň, beýleki gök-bakja ekinleriniň ýetişdirilen hasylyny ýygnap almak, bu önümleri ilata ýetirmek babatda degişli işler alnyp barylýar. Şeýle-de häkim şu ýyl welaýatda açylyp ulanmaga berilmegi meýilleşdirilýän desgalardaky gurluşyk işleriniň barşy barada hasabat berdi.

Hormatly Prezidentimiz welaýatyň gallaçy daýhanlaryny şertnamalaýyn borçnamalaryny üstünlikli ýerine ýetirmekleri bilen tüýs ýürekden gutlady hem-de mundan beýläk-de üstünlikleri arzuw etdi. Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalarda göz öňünde tutulan wezipeleriň üstünlikli ýerine ýetirilmeginiň möhüm ähmiýetine ünsi çekdi we bu ugurda welaýatda alnyp barylýan işleri gözegçilikde saklamagy tabşyrdy.

Soňra Daşoguz welaýatynyň häkimi D.Babaýewe söz berildi. Ol Gahryman Arkadagymyzyň doglan güni mynasybetli welaýatyň ähli ýaşaýjylarynyň adyndan iň gowy arzuwlaryny beýan edip, hormatly Prezidentimizi hem-de Milli Liderimizi Arkadag şäheriniň döredilmeginiň şanly senesi bilen gutlady.

Soňra D.Babaýew welaýatda alnyp barylýan möwsümleýin oba hojalyk işleri barada hasabat berdi. Nygtalyşy ýaly, ýetişdirilen bugdaý hasylyny ýygnap almak, galla oragyny gysga möhletde tamamlamak üçin zerur çäreler görülýär. Bu işlerde oba hojalyk tehnikalaryndan netijeli peýdalanylýar. Bugdaý öndürijiler bilen döwlete tabşyrylýan hasyl üçin hasaplaşyklar öz wagtynda geçirilýär. Sebitiň gowaça ekilen meýdanlarynda hatarara bejergi, mineral dökünler bilen iýmitlendirmek, ösüş suwuny tutmak işleri dowam edýär. Welaýatyň şaly ekilen meýdanlarynda agrotehnikanyň kadalaryna laýyklykda ideg etmek, mineral dökünler bilen iýmitlendirmek işleri geçirilýär. Ýazlyk ýeralmanyň, gök-bakja ekinleriniň hasylyny ýygnap almak hem-de ilata ýetirmek boýunça işler alnyp barylýar. Şeýle-de häkim şu ýyl welaýatda açylyp ulanmaga berilmegi göz öňünde tutulýan medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, oba hojalygynda dowam edýän jogapkärli möwsümi — galla oragyny üstünlikli tamamlamagyň, gowaça ideg işleriniň agrotehniki kadalara laýyklykda, ýokary hilli geçirilmeginiň zerurdygyny belledi we häkime birnäçe anyk tabşyryklary berdi.

Iş maslahatynda Lebap welaýatynyň häkimi D.Genjiýewe söz berildi. Ol Gahryman Arkadagymyzyň doglan güni mynasybetli welaýatyň ähli ýaşaýjylarynyň adyndan iň gowy arzuwlaryny beýan edip, hormatly Prezidentimizi hem-de Gahryman Arkadagymyzy Arkadag şäheriniň döredilmeginiň şanly senesi bilen gutlady.

Soňra häkim welaýatda dowam edýän möwsümleýin oba hojalyk işleri barada hasabat berdi. Bellenilişi ýaly, şu günler sebitde bugdaý hasylyny soňky dänesine çenli ýygnap almak boýunça işler dowam edip, orakdan boşan meýdanlarda sürüm işleri geçirilýär. Şunda oba hojalyk tehnikalarynyň netijeli işledilmegine aýratyn üns berilýär. Önüm öndürijiler bilen döwlete tabşyrylan bugdaý hasyly üçin hasaplaşyklar öz wagtynda geçirilýär. Welaýatyň gowaça ekilen meýdanlarynda hatarara bejergi, mineral dökünler bilen iýmitlendirmek, ösüş suwuny tutmak işleri agrotehnikanyň kadalaryna laýyklykda alnyp barylýar. Gök-bakja ekinleri ekilen meýdanlarda ideg etmek işleri bilen birlikde, ýetişdirilen hasyly ýygnap almak işleri utgaşykly ýerine ýetirilýär. Welaýatda şaly ekişi dowam edip, ekiş geçirilen meýdanlarda ideg işleri ýerine ýetirilýär. Şeýle-de häkim Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, häzirki wagtda dowam edýän möwsümleýin oba hojalyk işlerine ünsi çekdi we galla oragyny üstünlikli tamamlamak üçin ähli zerur çäreleri görmegiň, gowaça ideg işleriniň bellenen kadalara laýyklykda ýerine ýetirilmeginiň möhüm talap bolup durýandygyny belledi hem-de degişli tabşyryklary berdi.

Soňra Mary welaýatynyň häkimi D.Annaberdiýewe söz berildi. Ol Gahryman Arkadagymyzyň doglan güni mynasybetli welaýatyň ähli ýaşaýjylarynyň adyndan iň gowy arzuwlaryny beýan edip, hormatly Prezidentimizi hem-de Milli Liderimizi Arkadag şäheriniň döredilmeginiň şanly senesi bilen gutlady.

Soňra häkim welaýatda möwsümleýin oba hojalyk işleriniň barşy barada hasabat berdi. Bellenilişi ýaly, sebitde ýetişdirilen bugdaý hasylyny ýitgisiz ýygnap almak, galla kabul ediş nokatlarynda bökdençsiz kabul etmek, tabşyrylan hasyl üçin önüm öndürijiler bilen hasaplaşyklary öz wagtynda geçirmek boýunça zerur çäreler görülýär. Gowaça ekilen meýdanlarda hatarara bejergi, mineral dökünler bilen iýmitlendirmek, ösüş suwuny tutmak işleri ýerine ýetirilýär. Gök-bakja ekinleriniň ýetişdirilen hasylyny ýygnap almak, bu önümleri ilata ýetirmek boýunça degişli işler alnyp barylýar. Şeýle hem gant şugundyrynyň ekişi dowam edip, ekiş geçirilen meýdanlarda gögeriş suwy tutulýar. Mundan başga-da, häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, welaýatda galla oragyny üstünlikli tamamlamagyň, gowaça meýdanlaryndaky ideg işleriniň agrotehniki möhletlerde geçirilmeginiň zerurdygyny belledi we bu babatda birnäçe görkezmeleri berdi.

Soňra Ministrler Kabinetiniň Başlygynyň orunbasary T.Atahallyýewe söz berildi.

Wise-premýer oba hojalyk toplumynyň ähli işgärleriniň adyndan türkmen halkynyň Milli Liderine doglan güni mynasybetli gutlaglaryny beýan etdi. Ol hormatly Prezidentimizi we Gahryman Arkadagymyzy Arkadag şäheriniň döredilmeginiň şanly senesi bilen tüýs ýürekden gutlady hem-de döwlet Baştutanymyzyň we Gahryman Arkadagymyzyň janlarynyň sag, ömürleriniň uzak, il-ýurt bähbitli tutumly işleriniň hemişe rowaçlyklara beslenmegini arzuw etdi.

Soňra wise-premýer ýurdumyzyň oba hojalygynda dowam edýän möwsümleýin işler barada hasabat berdi. Bellenilişi ýaly, Diýarymyzda ýetişdirilen bugdaý hasylyny ýygnap almak hem-de ýygnalan hasyly talabalaýyk saklamak boýunça degişli işler alnyp barylýar. Önüm öndürijiler bilen döwlete tabşyrylan bugdaý hasyly üçin hasaplaşyklar geçirilýär. Gowaça ekilen meýdanlarda agrotehnikanyň kadalaryna laýyklykda ideg etmek, hususan-da, hatarara bejergi, mineral dökünler bilen iýmitlendirmek, ösüş suwuny tutmak işleri ýerine ýetirilýär. Ýurdumyzda azyk bolçulygyny has-da pugtalandyrmak barada öňde goýlan wezipelerden ugur alnyp, welaýatlarda gök-bakja ekinleriniň ýetişdirilen hasylyny ýygnap almak, olary ilata ýetirmek boýunça degişli işler alnyp barylýar. Möwsümleýin oba hojalyk işleriniň çäklerinde Daşoguz, Lebap welaýatlarynyň şaly ekilen meýdanlarynda ideg etmek işleri, Mary welaýatynda bolsa gant şugundyrynyň ekişi dowam edýär.

Hormatly Prezidentimiz hasabaty diňläp, ýurdumyzda galla oragynyň tamamlaýjy tapgyrda alnyp barylýandygyny belledi we wise-premýere ýetişdirilen bugdaý hasylyny ýitgisiz ýygnap almak boýunça alnyp barylýan işleri, gowaça ideg işlerini gözegçilikde saklamagy tabşyrdy.

Döwlet Baştutanymyz iş maslahatyna gatnaşyjylara ýüzlenip, häzirki wagtda dowam edýän möwsümleýin işlere ýene-de bir gezek ünsi çekdi we galla oragy möwsümini netijeli tamamlamak, gowaça ekilen meýdanlarda ideg işlerini agrotehnikanyň kadalaryna laýyklykda öz wagtynda geçirmek üçin zerur çäreleriň görülmelidigini belledi hem-de birnäçe anyk tabşyryklary berdi.

Hormatly Prezidentimiz Serdar Berdimuhamedow sanly ulgam arkaly geçirilen iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Özbegistan Respublikasynyň Prezidenti Şawkat Mirziýoýewiň arasynda telefon arkaly söhbetdeşlik geçirildi.

Özbegistanyň Baştutany Gahryman Arkadagymyzy doglan güni bilen gutlap, berk jan saglyk, uzak ömür, ýurdumyzyň mundan beýläk-de gülläp ösmegi, halkymyzyň abadan durmuşy ugrunda alyp barýan giň gerimli işlerinde üstünlikleri arzuw etdi. Şeýle hem özbek Lideri Gahryman Arkadagymyzyň Türkmenistan bilen Özbegistanyň arasyndaky gatnaşyklary ösdürmäge goşýan şahsy goşandyny aýratyn belläp, döwlet Baştutanymyz Serdar Berdimuhamedowa mähirli salamyny, iň gowy arzuwlaryny beýan etdi.

Hormatly Arkadagymyz hoşniýetli sözler we arzuwlar üçin minnetdarlyk bildirip, Türkmenistanyň Özbegistan bilen doganlyk gatnaşyklary, strategik hyzmatdaşlygy hemmetaraplaýyn ösdürmäge uly ähmiýet berýändigini belledi. Şunuň bilen baglylykda, Milli Liderimiz ýurtlarymyzyň we halklarymyzyň arasyndaky dostluk hem-de hyzmatdaşlyk gatnaşyklaryny berkitmäge goşýan şahsy goşandy üçin Prezident Şawkat Mirziýoýewe minnetdarlygyny beýan etdi. Özara hormat goýmaga, açyklyga, dostluga esaslanýan ýokary döwlet derejesindäki syýasy dialog ikitaraplaýyn hyzmatdaşlygy çuňlaşdyrmagyň baş şertidir. Şunuň bilen baglylykda, Gahryman Arkadagymyz iki döwletiň ýolbaşçylarynyň arasyndaky özara saparlaryň, duşuşyklaryň, yzygiderli gatnaşyklaryň syýasy-diplomatik, söwda-ykdysady, medeni-ynsanperwer we beýleki ulgamlarda hyzmatdaşlygy mundan beýläk-de ösdürmäge itergi berýändigini aýtdy.

Nygtalyşy ýaly, Türkmenistan we Özbegistan häzirki zaman ählumumy gün tertibinde duran möhüm meseleler boýunça garaýyşlarynyň we çemeleşmeleriniň umumylygyna daýanyp, halkara giňişlikde parahatçylygy, howpsuzlygy berkitmek, dünýäde durnukly ösüşi üpjün etmek, ekologiýa, ynsanperwer, beýleki meseleleri toplumlaýyn çözmek ugrunda işjeň çykyş edýärler. Gahryman Arkadagymyz Türkmenistanyň oňyn Bitaraplyga esaslanýan daşary syýasatyny, ýurdumyzyň Birleşen Milletler Guramasynyň, beýleki abraýly halkara düzümleriň çäklerinde öňe sürýän başlangyçlaryny yzygiderli goldaýandygy üçin Prezident Şawkat Mirziýoýewe minnetdarlyk bildirip, Türkmenistanyň hem, öz gezeginde, Özbegistanyň halkara ähmiýetli başlangyçlaryny goldaýandygyny aýtdy.

Türkmenistanyň Halk Maslahatynyň Başlygy ikitaraplaýyn söwda-ykdysady hyzmatdaşlygyň meseleleri barada aýdyp, soňky ýyllarda özara haryt dolanyşygynyň yzygiderli artdyrylýandygyny, harytlaryň we hyzmatlaryň görnüşleriniň giňeldilýändigini, ykdysady hyzmatdaşlygyň täze görnüşleriniň döredilýändigini kanagatlanma bilen belledi. Şunda maýa goýum, tehnologik, innowasion ugurlar wajyp ähmiýete eýedir. Şunuň bilen baglylykda, Gahryman Arkadagymyz ikitaraplaýyn döwletara hyzmatdaşlygyň gurallarynyň bilelikdäki tagallalary mundan beýläk-de utgaşdyrmaga, Türkmenistan bilen Özbegistanyň arasyndaky ykdysady hyzmatdaşlygy hil taýdan täze derejä çykarmaga gönükdirilen ylalaşyklaryň doly durmuşa geçirilmegini üpjün etjekdigine berk ynam bildirdi.

Medeni-ynsanperwer ulgam, ylym-bilim hyzmatdaşlygy türkmen-özbek gatnaşyklarynyň möhüm ugurlarynyň biri bolup durýar. Milli Liderimiz bu ugurlarda bilelikde uly işleriň amala aşyrylandygyny, türkmen we özbek halklarynyň medeniýetini, däp-dessurlaryny gorap saklamak, baýlaşdyrmak, ýaş nesli terbiýelemegiň esasy bolan ruhy gymmatlyklary ösdürmek boýunça hyzmatdaşlygyň mundan beýläk-de dowam etdiriljekdigini belledi. Munuň özi häzirki wagtda çalt üýtgeýän geosyýasy we geoykdysady ýagdaýlaryň dünýäniň köp sanly halklarynyň asyrlarboýy kemala gelen durmuş ýörelgelerine, dünýägaraýşyna gönüden-göni täsir edýän döwründe aýratyn ähmiýete eýedir. “Gadymy siwilizasiýalaryň wekilleri, dünýä belli alymlaryň, ussatlaryň, akyldarlaryň we döwlet işgärleriniň nesilleri hökmünde türkmen hem-de özbek halklary asyrlarboýy beýik ylmy açyşlaryň gözbaşynda durup, özboluşly bilim ulgamlaryny döredipdirler, ylym bilen işjeň meşgullanypdyrlar. Netijede, häzirki wagtda Türkmenistan we Özbegistan halkara bileleşigiň abraýly agzalary hökmünde syýasatda, ykdysadyýetde, durmuş ulgamynda öňdebaryjy taglymlary öňe sürmek bilen bir hatarda, özleriniň milli aýratynlyklaryny we gymmatlyklaryny asyl nusgada saklamagy başardylar” diýip, Gahryman Arkadagymyz aýtdy.

Telefon arkaly söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz hem-de Özbegistan Respublikasynyň Prezidenti Şawkat Mirziýoýew däp bolan dostlukly türkmen-özbek gatnaşyklarynyň mundan beýläk-de üstünlikli ösdüriljekdigine ynam bildirip, iki ýurduň doganlyk halklaryna parahatçylyk, abadançylyk hem-de gülläp ösüş arzuw etdiler.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Gazagystan Respublikasynyň Prezidenti Kasym-Žomart Tokaýewiň arasynda telefon arkaly söhbetdeşlik geçirildi.

Prezident Kasym-Žomart Tokaýew Gahryman Arkadagymyzy doglan güni bilen tüýs ýürekden gutlap, berk jan saglyk, rowaçlyk, jogapkärli döwlet işinde täze üstünlikleri arzuw etdi. Şeýle hem dostlukly ýurduň Prezidenti gazak-türkmen gatnaşyklaryny has-da pugtalandyrmakda Milli Liderimiziň uly goşandyny belledi we pursatdan peýdalanyp, hormatly Prezidentimize mähirli salamyny beýan etdi.

Gahryman Arkadagymyz mähirli gutlaglar, hoşniýetli arzuwlar üçin minnetdarlyk bildirip, Prezident Kasym-Žomart Tokaýewiň ikitaraplaýyn gatnaşyklary ösdürmekdäki tagallalaryna ýokary baha berýändigini aýtdy.

Söhbetdeşligiň dowamynda nygtalyşy ýaly, köp asyrlaryň dowamynda türkmen we gazak halklarynyň arasyndaky gatnaşyklar dost-doganlyk, hoşniýetli goňşuçylyk, özara hormat goýmak, birek-birege goldaw bermek ýörelgeleri esasynda ösdürilýär. Hut şu ýörelgeler häzirki döwürde we uzak möhletleýin geljekde ikitaraplaýyn gatnaşyklary ösdürmek üçin ygtybarly binýat bolup hyzmat edýär. Türkmen-gazak hyzmatdaşlygy syýasy-diplomatik, söwda-ykdysady, medeni-ynsanperwer ulgamlarda özara gatnaşyklaryň giň toplumyny öz içine alýar. Bu ugurlaryň her biri boýunça hyzmatdaşlyk mehanizmleri — hökümetara toparlar, ugurdaş iş toparlary we beýleki utgaşdyryjy düzümler hereket edýär. Olar gazanylan ylalaşyklaryň netijeli durmuşa geçirilmegini üpjün edýärler. Şunuň bilen baglylykda, Gahryman Arkadagymyz syýasat, diplomatiýa ulgamlarynda gatnaşyklaryň ýokary derejesini nygtady hem-de munuň işjeň döwletara dialogda, ýokary derejeli ikitaraplaýyn saparlarda, daşary syýasy başlangyçlaryň utgaşdyrylmagynda, halkara giňişlikde alnyp barylýan hyzmatdaşlykda öz beýanyny tapýandygyny aýtdy.

Bellenilişi ýaly, ýokary döwlet derejesindäki duşuşyklar ikitaraplaýyn gatnaşyklary pugtalandyrmakda, özara düşünişmegi çuňlaşdyrmakda, strategik çözgütleri işläp taýýarlamakda, bilelikdäki işiň geljekki ugurlaryny kesgitlemekde möhüm orny eýeleýär. Söhbetdeşligiň dowamynda ählumumy gün tertibiniň esasy meseleleri boýunça ýurtlarymyzyň garaýyşlarynyň meňzeşdigi ýa-da golaýdygy nygtaldy. Bu bolsa netijeli özara gatnaşyklar üçin berk binýady döredýär we halkara bileleşigiň öňünde duran wezipeleri has netijeli çözmäge mümkinçilik berýär. Bu ugurda Türkmenistan bilen Gazagystanyň halkara guramalaryň, ilkinji nobatda, Birleşen Milletler Guramasynyň çäklerinde netijeli hyzmatdaşlyk edýändikleri aýdyldy. Milli Liderimiz Türkmenistanyň hemişelik Bitaraplyk hukuk derejesini, ýurdumyzyň BMG-niň we beýleki düzümleriň çäklerinde öňe sürýän başlangyçlaryny goldaýandygy üçin Gazagystanyň Prezidentine minnetdarlyk bildirdi.

Gahryman Arkadagymyz sözüni dowam edip, söwda-ykdysady hyzmatdaşlygyň ýurtlarymyzyň arasyndaky gatnaşyklaryň esasy ugurlarynyň biri bolup durýandygyny belledi hem-de Türkmenistanyň Gazagystan bilen söwda gatnaşyklaryny mundan beýläk-de ösdürmäge, özara haryt dolanyşygynyň möçberini artdyrmaga, ykdysady gatnaşyklary diwersifikasiýalaşdyrmaga möhüm ähmiýet berýändigini nygtady. Şunda bu maksatlara ýetmek üçin ähli zerur şertleriň — syýasy erkiň, ykdysady mümkinçilikleriň, geljegi uly strategik maksatlaryň bardygy aýdyldy.

Bellenilişi ýaly, türkmen-gazak gatnaşyklarynda medeniýet, bilim, ylym we beýleki ulgamlardaky hyzmatdaşlyk aýratyn orny eýeleýär. Halklarymyzyň taryhynyň, medeniýetiniň, däp-dessurlarynyň, gymmatlyklarynyň umumylygy jemgyýetçilik durmuşynyň ähli ugurlarynda dost-doganlygy we hemmetaraplaýyn hyzmatdaşlygy pugtalandyrmak üçin ygtybarly binýat bolup hyzmat edýär.

Telefon arkaly söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de Gazagystan Respublikasynyň Prezidenti Kasym-Žomart Tokaýew birek-birege berk jan saglyk, uzak ömür, jogapkärli döwlet işlerinde üstünlikleri, iki ýurduň doganlyk halklaryna bolsa parahatçylyk, bagtyýarlyk, abadançylyk, rowaçlyk arzuw etdiler.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik geçirildi.

Russiýanyň parlamentiniň ýokarky palatasynyň ýolbaşçysy Gahryman Arkadagymyzy doglan güni bilen mähirli gutlap, tüýs ýürekden berk jan saglyk, uzak ömür, jogapkärli döwlet işinde täze üstünlikleri arzuw etdi. Şeýle hem Walentina Matwiýenko Milli Liderimiziň rus-türkmen gatnaşyklaryny ösdürmekde bitirýän hyzmatlarynyň ähmiýetini belläp, Prezident Wladimir Putiniň Gahryman Arkadagymyza we hormatly Prezidentimize salamyny, rowaçlyk hem-de abadançylyk baradaky iň gowy arzuwlaryny ýetirdi.

Türkmenistanyň Halk Maslahatynyň Başlygy hoşniýetli sözler üçin minnetdarlyk bildirip, Russiýa Federasiýasynyň Prezidentine iň gowy arzuwlaryny beýan etdi hem-de Türkmenistanyň Russiýa Federasiýasy bilen ýola goýlan çuňlaşdyrylan strategik hyzmatdaşlyga uly ähmiýet berýändigini belledi. Ikitaraplaýyn hyzmatdaşlygyň ähli ugurlaryny öz içine alýan duşuşyklardyr gepleşikler dostlugyň, özara hormat goýmagyň, goldaw bermegiň berk däplerine esaslanýan gatnaşyklary yzygiderli pugtalandyrmaga ýardam edýär. Ýokary döwlet derejesinde ýola goýlan dialog ikitaraplaýyn gatnaşyklary we köpugurly özara hyzmatdaşlygy ösdürmekde esasy orny eýeleýär. Şunuň bilen baglylykda, Gahryman Arkadagymyz ýakynda «Russiýa — Yslam dünýäsi» atly halkara foruma gatnaşmak üçin Kazan şäherine amala aşyran saparynyň çäklerinde Prezident Wladimir Putin bilen geçiren telefon arkaly söhbetdeşligini aýratyn nygtady. Şol söhbetdeşligiň dowamynda syýasy-diplomatik, söwda-ykdysady, medeni-ynsanperwer we beýleki ulgamlarda türkmen-rus hyzmatdaşlygyny mundan beýläk-de ösdürmek bilen baglanyşykly meseleleriň giň toplumy barada pikir alşyldy.

Milli Liderimiz Walentina Matwiýenkonyň tagallalary netijesinde Türkmenistanyň we Russiýanyň arasyndaky parlamentara gatnaşyklaryň üstünlikli ösdürilýändigini belledi. Hut Walentina Matwiýenkonyň Russiýanyň Senatynyň ýolbaşçysy, GDA-nyň Parlamentara Assambleýasynyň Geňeşiniň Başlygy we halkara parlament hereketiniň görnükli wekili hökmünde alyp barýan işi köp sanly döwletleriň kanun çykaryjy edaralarynyň arasyndaky gatnaşyklary pugtalandyrmak boýunça möhüm başlangyçlar üçin esas bolup hyzmat edýär. Türkmenistanda bu işlere ýokary baha berilýär we uly hormat goýulýar.

Hormatly Arkadagymyz Russiýa Federasiýasynyň Federal Ýygnagynyň Federasiýa Geňeşiniň Başlygy bilen bilelikde jemgyýetçilik, syýasy we ynsanperwer ulgamlarda asylly başlangyçlary durmuşa geçirmäge gönükdirilen işleriň geljekde-de dowam etdiriljekdigini belledi hem-de şu ýylyň oktýabrynda “Awaza” milli syýahatçylyk zolagynda Walentina Matwiýenkonyň ýolbaşçylygynda jemgyýetde zenanlaryň ornuny pugtalandyrmaga, demografiýa, saglygy goraýyş meselelerine bagyşlanan halkara maslahatlaryň geçiriljekdigini aýtdy. Şeýle hem Gahryman Arkadagymyz şu ýylyň noýabrynda Türkmenistanda GDA-nyň Parlamentara Assambleýasynyň nobatdaky mejlisiniň ýokary derejede geçiriljekdigine ynam bildirdi.

Halk Maslahatynyň Başlygy sözüni dowam edip, RF-niň Federal Ýygnagynyň Federasiýa Geňeşiniň Başlygy bilen bilelikde alnyp barylýan işlerde halklarymyzyň taryhyny öwrenmäge we wagyz etmäge gönükdirilen işlere möhüm ähmiýet berilýändigini, munuň bolsa Türkmenistan bilen Russiýanyň arasyndaky dostlugy berkitmek babatda berk binýat bolup hyzmat edýändigini nygtady. Şunuň bilen baglylykda, Gahryman Arkadagymyz türkmen tarapynyň A.S.Puşkin adyndaky umumybilim berýän türkmen-rus mekdebiniň binalar toplumyny giňeltmek, Türkmen-rus uniwersitetini döretmek, A.S.Puşkin adyndaky döwlet rus drama teatrynyň täze binasyny gurmak, Aşgabatda halklarymyzyň dostlugyna bagyşlanan ýadygärligi bina etmek ýaly taslamalary durmuşa geçirmäge taýýardygyny tassyklady.

Milli Liderimiz Russiýada türkmen diline, türkmen halkynyň baý we özboluşly medeniýetine, beýik türkmen filosoflarynyň, akyldar şahyrlarynyň, şol sanda Magtymguly Pyragynyň edebi hem-de ruhy mirasyna uly hormat goýulýandygy üçin minnetdarlyk bildirdi we öz gezeginde, türkmen tarapynyň hem Türkmenistan bilen Russiýa Federasiýasynyň arasyndaky dostlugy, hyzmatdaşlygy has-da pugtalandyrmak üçin ähli tagallalary etjekdigini tassyklady.

Gahryman Arkadagymyz Walentina Matwiýenkonyň Türkmenistanyň ýakyn we ygtybarly dosty hökmünde türkmen-rus gatnaşyklaryny ösdürmäge uly goşant goşýandygyny belledi hem-de türkmen halkynyň adyndan Russiýa Federasiýasynyň Federal Ýygnagynyň Federasiýa Geňeşiniň Başlygyna minnetdarlyk bildirdi.

Telefon arkaly söhbetdeşligiň ahyrynda Türkmenistanyň Halk Maslahatynyň Başlygy hem-de Russiýa Federasiýasynyň Federal Ýygnagynyň Federasiýa Geňeşiniň Başlygy birek-birege berk jan saglyk, jogapkärli döwlet işlerinde mundan beýläk-de üstünlikleri, Türkmenistanyň we Russiýanyň dostlukly halklaryna bolsa parahatçylyk, bagtyýarlyk, abadançylyk, rowaçlyk arzuw etdiler.

Habaryň resmi çeşmesi: (“Türkmenistanyň Döwlet habarlar agentligi” web-saýty)